良田坳

大家知道形成菠蘿山崎嶇不平的原因嗎？

其中最主要的兩個原因是夏天充足的雨量和新界西北地理因素。香港處於亞熱帶地區，夏天雨量逾2000毫米。當雨水不斷衝擊地面，表層泥土和植物會被沖走，使峽谷中間出現了明顯的凹痕，形成沖溝。而地理因素方面，菠蘿山主要以不耐於侵蝕花崗岩組成，在夏天逾30度的高溫下，加劇了風化作用和侵蝕作用，所以菠蘿山上的石頭凹凸不平，如同表面佈滿金黃鬆脆「脆皮」的菠蘿包。

仲搭小巴去下白泥睇日落？不如今次由菠蘿山行去下白泥啦！路程約2-3個鐘。去完下白泥仲可以去元朗食B仔涼粉。菠蘿山又名「港版大峽谷」，山高121米，最適合行山初哥。山位於屯門良景邨和山景邨之間，因為十分接近民居，不時會看到不少街坊上山晨運，或拎住大大小小的水樽上山入山水。

菠蘿山最為人熟悉的地方莫過於是其「大峽谷」，風景一絕，筆者企係山上望落去「大峽谷」，認真腳仔軟。但其實呢度係青山操炮區嘅範圍，係前英軍嘅練靶場，依加係解放軍嘅。行山前可到政府網站查下青山靶場嘅練靶時間。

一直沿住山路行，可以遠眺深圳灣同深圳灣大橋。落到山再向右行20分鐘，就黎到下白泥呢個睇日落勝地。下白泥係個位於元朗西部嘅泥灘。呢度唔單止係個睇日落嘅好地方，仲可以睇到紅樹林﹑招潮蟹﹑彈塗魚……生態價值極高。所以黎到呢度，千其唔好漏低垃圾呀！

沿路會見到唔少農埸，仲有羊咩咩，係一家大細嘅假日好去處。下白泥村公所附近仲可以見到一級歷史建築物—雙層青磚碉堡。碉堡建於1910年，由孫中山友人兼興中會中堅分子鄧蔭南所建。喺廣州新軍之役事敗後，革命分子曾藏身於此，避開清軍嘅緝捕。不過依加嘅碉堡外面被圍欄圍住，進行緊修葺工程。所以我地只可以遠觀碉堡。

‍

除了到下白泥看日落，大家亦不妨到訪香港八個灌溉水塘之一的藍地水塘。藍地灌溉水塘位於屯門虎地，於1957年3月28日由港督葛量洪揭幕啓用，由山上多條引水道匯集而成，再經下游溪澗流入附近村落，供村民作灌溉之用。它的出現，是用來補償村民在興建大欖涌水塘的耕地和水源的損失。現時，屯門耕地大減，藍地水塘的灌溉功能不及從前，但虎地一帶仍有些農田，仍靠水塘養育。

‍

而水塘旁邊的是藍地石礦場，建於1960年，是本港最後一個石礦場，將在2022年至2023年停運。

石礦業曾經是香港最主要的產業，早在開埠初期，全港的礦場超過一百個，不少著名景點，如赤柱的美利樓和香港終審法院都是由本港所採的花崗岩建成的。但由於石礦等天然資源耗盡，本港的石礦頁走向式微，如今只剩下藍地石礦場仍然運作。

藍地石礦場屹立不倒，由1960年到至今陪伴香港走過無數個歲月，富歷史價值，十分值得一看！

‍