其實前往海岸保護區嘅成個路程都算輕鬆，大部分都係平路，好少斜坡同梯級，就算係少行山嘅人都絕對無問題。沿途嘅風景都好靚，喺行山嘅過程中更可以睇到無敵大海景，真係令人心曠神怡。
燈塔
呢座全白嘅燈塔係香港歷史法定古跡，建築外觀有陣復古氣息，當連同藍天白雲咁去睇，成個景觀就會變得好清新，絕對比得上墾丁嘅燈塔！
雷音
望落去平平無奇嘅岩石洞，當你走入去，就會望到另一邊嘅出口，好似展現左另一片天空、另一個世界咁。呢個洞仲特別涼爽添，好適合去乘涼。
蟹洞
蟹洞點解叫做蟹洞呢？原因好簡單，就係因為佢外形好似一隻蟹企緊響度！蟹洞其實係海蝕造成，所以就有咁嘅拱形。另外，蟹洞又比人叫做上帝之眼同彩虹之門，係因為喺呢個洞口，你可以睇到壯觀嘅景色，望住一望無際嘅海景，中間又夾雜住一啲小島，同時間又可以感受啲浪湧過黎嘅震撼感，真係令人歎為觀止。
鯨魚骨
呢副骨骸嘅主人翁，就係1955年喺維港擱淺嘅鬚鯨，有唔少人都誤會咗佢係香港海洋公園表演咗15年嘅殺人鯨海威。如今，呢副骨骸更成為咗鶴咀嘅重要地標。
