森林咖啡

Forest Cafe

如果有朋友話想同你去文青Cafe,你會諗起去邊度?尖沙咀樓上舖?觀塘工廈?定係去遠少少,走入新界搵食?如果呢啲地方都開始去到有啲悶,週末又想去啲郊外少少嘅地方放鬆一下嘅話,不妨搭車入位於大埔同元朗之間嘅林錦公路,試下呢間充滿田園風味嘅森林咖啡。

森林咖啡
最後更新日期
8/3/2024
31/7/2020
景點分類
吃貨天堂
地區
新界東
建議逗留時間
1
小時
難度
/5

雖然係幾遠,不過週末時間比較鬆動,放慢下腳步都係好事嚟嘅。喺大埔坐20分鐘巴士入嚟,到新村站落車,心諗咁荒蕪嘅鄉郊,點會有間餐廳喺度呢?果然,過馬路行前幾步就見到掛住喺樹上嘅指示牌,跟住箭咀方向行左幾步泥路,咖啡店小屋就出現喺眼前啦!Café係一間單層嘅屋仔,花園亦有唔少座位;不過原來都幾多人嚟呢度食野,所以唔想等好耐位,又或者某啲野食賣哂嘅話,就要預好時間碰碰運氣啦。

室内座位唔多;木材質感嘅佈置,膽機播住蘇打綠嘅音樂,喺呢度望住窗外面嘅樹林嘆杯咖啡絕對係心礦神怡。呢度嘅野食以西式漢堡、Fish and chips 為主,價錢同出面嘅café差唔多。不過一分錢一分貨,啲野食睇得出係好有心機整,雖然唔係頂級好食,但淨係食個環境都抵啦!店外嘅裝修都花左好多心思,鐘意影靚相嘅朋友可以去店出面嘅長長bar檯扮下文青,又或者去後門嘅花園仔坐韆鞦傾下計,影下相。

老闆話啲沙律菜係佢自己喺村內嘅田親自種嘅,啱啱摘嘅本地菜真係特別爽特別甜。佢話好彩呢度係佢自己嘅地方,所以先可以自己打造呢間咁好嘅餐廳,一腳踢實現自己嘅夢想。只可惜隨住城市發展、政府一面倒抹殺城鄉共融概念、又唔鼓勵本地農業,呢啲咁樸素,咁有人情味嘅地方已經係碩果僅存。如果大家都鐘意呢啲地方嘅話,就要多啲發掘,俾眼裏只有錢嘅當權者知道,鄉郊都有佢嘅存在價值。

No items found.

交通

喺大埔/元朗乘坐 64K 巴士,到新村站落車後跟指示牌行兩分鐘

注意事項

營業時間

星期二至六 12:00-18:00

星期日 13:00-18:00

逢星期一休息