嘉道理農場

如果想喺香港睇下動植物，可以去位於海洋公園或者金鐘嘅動植物公園；但如果想再特別啲，遠離塵囂欣賞下動物同花草樹木嘅話，位於新界嘅嘉道理農場都係一個唔錯嘅選擇。嘉道理農場位於來往大埔同元朗之間嘅林錦公路，佔地有成二百個足球場咁大，如果要細心行的話真係一日都行唔完。農場依山而建，大部份嘅遊客設施同景點都設喺山下部份，而山上部份就係幾條生態徑同埋研究保育用嘅實驗農場。想探下動物的話，農場有兩棲類動物、豬、野豬、鳥類、仲有識講野嘅鸚鵡俾大家欣賞；了解下佢地嘅習性，同佢地自拍下，啱哂一家大細或者年輕一族去探個究竟。文青一族想影輯靚相，做下山系男孩/女孩？農場裏面種滿左超過1000種唔同嘅植物，有溫室裏面嘅仙人掌、果樹、同埋好似成個森林咁、位於山谷嘅原生林。加埋園內嘅溪流瀑布、石頭小徑，可以好似置身外地一樣，呼吸一下新鮮空氣，散散心過一個悠閒嘅週末。