小夏威夷徑

唔講唔知小夏威夷徑原來係大牛湖嘅遺址。以前嘅大牛湖仲係香港小學旅行嘅熱門地點之一。睇番香港四五十年代嘅《華僑日報》，就會發現以前香港嘅學校成日帶學生由尖沙嘴碼頭出發，專程到小夏威夷徑行山。原來小夏威夷徑已經陪伴咗好多香港人成長，當時嘅小學生都已經長大，可能仲會帶自己嘅下一代行小夏威夷徑，一齊搵番之前嘅童年回憶添！

‍

‍

‍

小夏威夷徑行山路線需時較短，瞓到自然醒先出發都未遲。搭地鐵到寶琳站C出口，行過寶琳戲院，過埋馬路，向山頭嘅方向行，就會行到魷魚灣村嘅入口啦。行入村，穿過垃圾站，喺馬路嘅左邊就有一條往山上行嘅小徑。要留意𠵱條小徑嘅入口較隱藏，一直沿路行，穿過竹林，石級同一間荒廢嘅小屋，就會見到一條分叉路，循右手邊嘅石級上，就可以見到小夏威夷徑嘅指示路牌啦。

沿途都有放咗椅子嘅休息區(呢條行山路線沿途都有長凳俾遊人休息），又有山澗同大樹遮陰，都唔會辛苦。差唔多行到終點時，就會聽到水聲，又會睇到另一個分叉路口，跟住往澳頭嘅方向就可以到瀑布啦！行到瀑布一定會「嘩」一聲，近距離望住瀑布，聽住水聲，完全可以感受到瀑布嘅威力。估唔到咁近市區，行個幾鐘都可以見到咁壯觀嘅瀑布！

離開瀑布之後，行番回頭嘅分叉路口，沿將軍澳村嘅方向行，就可以出番去寶琳地鐵站，又或者繼續向前行去井欄樹村坐返車出彩虹／鑽石山，十分方便。今個週末不妨一家人一齊去小夏威夷徑行下山啦！