泥灘平坦而開揚,相對其他沙灘人流較少,所以好容易就影到靚相。泥涌對住嘅係平靜嘅吐露港,可以遠眺到對岸高大嘅八仙嶺同埋船灣淡水湖附近嘅白沙頭,配埋涌口嘅河水倒影,可以影到海天一色、仙境一樣嘅天空之境!
![](https://assets-global.website-files.com/65eac8eee798e38960e4321a/65eae1222b4f110d00641067_5ad847382f5a466698d840ff_DSC02051_vair.jpeg)
講開泥灘地貌,當然要提下呢度嘅植物同小動物啦!其實泥涌嘅生態價値非常高,鹹淡水交界同岸邊嘅沼澤成為左呢啲特別物種嘅居所。喺小徑行入去你會發現平時喺市區唔會見到嘅藤狀植物,泥灘上亦有好多蠔同蟹仔,一家大細去嘅話小朋友都會大開眼界。如果唔怕少少泥濘嘅話,潮退嘅時候可以行出泥灘影靚相添。
灘上面有一座因為日久失修而冧咗嘅渡頭,小心啲企上去影相都幾有特色架。潮漲嘅時候海水會淹沒泥灘,剩返渡頭嘅橋橔露出水面,別有另一番風味。唔夠候嘅話,沿住灘邊嘅小徑行入去會見到一個新嘅泥涌碼頭,都有影相位架!
![](https://assets-global.website-files.com/65eac8eee798e38960e4321a/65eae1222b4f110d00641063_5ad8475208f6ceae5fd1e9d1_DSC02051v.jpeg)
隨住城市發展,好多沿岸地方都俾政府或者發展商睇中靚景而起樓。例如,大埔龍尾灘即將興建人工沙灘作康樂用途。政府雖然進行一系列嘅生物遷移,將指定嘅海洋生物,包括海星、海膽等搬到附近嘅汀角東海域,但成效被環保團體質疑,亦難以重建完整嘅生態系統。首先,龍尾嘅地理位置容易聚積污染物,水質唔適宜作大眾康樂用途。再講,大家究竟需要一個「人工沙灘」游水,定係天然完好、生生不息嘅泥灘?自然係珍貴嘅資源,發展將會帶來不可逆轉嘅破壞,到以後我地想睇返海星、蟹仔,可能已經再無機會喇!好似泥涌咁有生態價值嘅地方都消失得七七八八了。為左小動物,為左下一代,我地都要好好珍惜香港僅存嘅各樣生態環境。
![](https://assets-global.website-files.com/65eac8eee798e38960e4321a/65eae1222b4f110d0064105f_5ad84764998e0d0df9b59a60_DSC01969v.jpeg)