CL 2
一入到石澳，第一個景點就係你隔離，就係二級歷史建築——石澳巴士總站！因為石澳位置偏僻，所以當時營運港九路線嘅中華汽車有限公司就起咗依棟兩層樓，俾站長同職員休息，建築設計仲係50年代標誌性建築，可以細心觀察，回味石澳以前嘅歷史痕跡。
往外望就可以見到景色優美，水清沙幼嘅石澳泳灘，非常適合係到放鬆心情，玩下水。不過你又知唔知道原來沿著泳灘向右行到最尾端，會見到一個供奉著異國女神(複製品)嘅海神廟。女神係木刻嘅長形神像，眉間鑲有紅石。話說海神廟嘅來由係四十幾年前，由一個商人甄球係海邊所發現，當時經生意困難嘅佢向神像祈求渡過難關，為求報答就會為佢建廟。雖然女神歷史並唔長，但石澳嘅居民每年天后誕同十年一次嘅太平清醮都會請埋依位海神到戲棚睇戲，相當特別。
講開神，就不可不提石澳嘅天后古廟，佢除咗係三級歷史建築，建於1891年，清朝光緒十七年，澳係天后寶誕嘅日期仲有別於香港其他地方，一般黎講會係農曆三月廿三日賀壽，但石澳除咗農歷三月廿三日進行賀壽之外，仲會係農曆九月至十一月，正值秋冬之間，三村聯合舉行辨神功戲再為天后娘娘賀壽。相傳係舊時石澳係漁村，出海嘅時間會同傳統天后賀誕撞正，交通又唔方便，戲班出入村落需時，再加上農歷三月至八月係打風季，搭棚都會有影響，綜合以上幾點之下，村民就向天后娘娘問卜改期，就一直到今時今日都會問卜定日子恭賀，大家有機會可以睇下會唔會遇上為期五日六夜嘅神功戲。而緊貼廟旁就係石澳居民協會，係中華巴士營運之前，石澳居民的嘅交通就係由佢哋一手包辦。
再一直行，會見到石澳健康院，係依到你可能會記起一個場景，就係電影《喜劇天王》張柏芝同周星馳嘅對戲，雖然原本嘅石牆同附近嘅文新學校已因山竹吹毀，但係健康院本身都非常美麗，粉紅色嘅外牆配搭藍天碧海，又係一幅異國風情嘅圖畫。而文新學校原址會進行修復同改建做社區會堂作居民聯誼用途。
行返去石澳山仔路即係過往去大頭洲嘅路段，雖然橋已毀，但沿途可見石灘同大海景，好天氣仲可以由觀景台眺望鶴咀半島同香港第一座燈塔，即使過唔到橋，沿路欣賞靚景都係好選擇。回程亦可以一行石澳後灘，人少至餘仲可以沙灘漫步，曬下太陽，思考人生。
CL 3
石澳原來咁多地方可以去，真係好意外呢。不過踏入石澳前，記得注意聲量，避免影響當地居民生活。
CL 4