.jpeg)
雖然赤柱唔算好大，但佢獨有嘅古色古香，同異國情調融合嘅氛圍，絕對會令你不自覺地放慢香港人急速嘅步伐，好好咁享受呢種安靜愜意嘅環境。
赤柱市集
市集入面有售賣各式各樣嘅用品，由衫褲鞋襪、碗碗碟碟，到琴棋書畫，你想像到嘅都會喺度出現。好多外國旅客嚟到仲會買啲旅遊紀念品，例如明信片同寫有「I love Hong Kong」嘅衫，帶返屋企留念添！
.jpeg)
赤柱廣場
赤柱除左有各種商店之外，最大嘅特色莫過於佢嘅露天廣場！其實佢係一個玻璃天幕嘅半露天劇場同以海盜船為主題嘅遊樂場結合而成。每逢佳節，例如聖誕節，廣場就會開放畀唔同商戶擺檔，做一個限時市集。
.jpeg)
美利樓
呢座大樓雖然依家用嚟做零售同餐飲行業，但佢其實係維多利亞時期所起嘅建築物，歷史悠久！雖然佢由中環被迫搬到嚟赤柱，但佢身上既歷史痕跡，仍然無礙佢備受關注，成為香港法定古跡之一！
卜公碼頭
卜公碼頭嘅前身係位於中環嘅畢打碼頭，同美利樓一樣，後嚟就搬咗過嚟赤柱呢度。不過，至今佢仍然保留住英式建築風格。大家都以為佢只係一個打咭位，其實呢度仲有渡輪往返蒲台島㗎！
赤柱海灘
講到赤柱，當然唔少得陽光與海灘喇！行完半日覺得攰嘅話，除左可以喺海濱長廊度欣賞夕陽，喺赤柱正灘一邊玩沙，一邊望住太陽落山都好有感覺㗎！